Абвешчаныя лаўрэаты прэміі «Кніга году Ўэльса» (Wales Book of the Year)

17 чэрвеня 2009

Дэбара Кей Дэвіс (Deborah Kay Davies), аўтар англамоўнага дэбютнага зборніка апавяданняў, аб’яднаных тэмай дзяцінства дзвюх сясцёр, “Грэйс, Тамар і Ласла Прыгожы” (Grace, Tamar and Laszlo the Beautiful) і Ўільям Оўэн Робертс (Wiliam Owen Roberts), аўтар валійскамоўнага рамана “Петраград” (Petrograd), дзеянне якога адбываецца ў часы бальшавіцкай рэвалюцыі ў Расіі, сталі сёлетнімі пераможцамі літаратурнай прэміі Валійскага нацыянальнага агенцтва па развіцці літаратуры і таварыства аўтараў Academi (Welsh National Literature Promotion Agency and Society for Authors).

grace, tamar

Дэбара Кей Дэвіс з паўднёвага Ўэльса, паэт, тройчы пераможца паэтычнага конкурсу Rhys Davies, аўтар паспяховага зборніка вершаў “Тое, чаго, як вы думаеце, я не ведаю” (Things You Think I Don't Know). Выкладае курс па творчым пісьме ў Кардыфскім і Гламорганскім універсітэтах.

Ўільям Оўэн Робертс

Містэр Робертс вырас у паўночным Ўэльсе, цяпер жыве ў Кардыфе. Яго першы раман “Бінга!” (Bingo! 1985) быў прызнаны першым постмадэрнісцкім раманам на валійскай мове. Раман “Мор” (Y Pla, 1987) прынёс аўтару прэмію Валійскай Рады мастацтваў (Arts Council of Wales award) і быў перакладзены на ангельскую, нідэрландскую, французскую, нямецкую, венгерскую і славацкую мовы. Аўтар некалькіх п’есаў, сцэнарыяў для тэле- і радыёсерыялаў.

Агенцтва Academi судзейнічае распаўсюджванню валійскай мовы і культуры, арганізоўвае Міжнародны паэтычны конкурс у Кардыфе (Cardiff International Poetry Competition), вядзе праекты “Нацыянальны паэт Ўэльса” (National Poet of Wales), “Валійская акадэмічная энцыклапедыя” (Welsh Academy Encyclopaedia of Wales).

паводле http://www.academi.org/home/i/134388/