Брытанскі ілюстратар. Нарадзіўся ў сям’і ілюстратара і ўспадкаваў прафесію бацькі, як і яго браты Томас і Ўільям Робінсаны. Атрымаў месца ў Каралеўскай акадэміі, аднак вучыцца там не змог праз недахоп грошай.

Яго першай ілюстраванай кнігай быў паэтычны зборнік Роберта Льюіса Стывенсана “Дзіцячы сад вершаў” (1895), які змяшчаў каля 100 малюнкаў пяром і атрамантам. Кніга набыла вялікую папулярнасць і перажыла шмат перавыданняў. За сваё жыццё Робінсан праілюстраваў мноства дзіцячых кніг, у тым ліку “Прыгоды Алісы ў Краіне цудаў” (1907), казкі братоў Грымаў (1910) і іншыя.