Як пісьменнік Душан Тарагел дэбютаваў у канцы 1980-х, калі на старонках славацкіх часопісаў з’явіліся ягоныя апавяданні. У 1997 годзе пабачыла свет першая кніга Тарагела “Казкі для непаслухмяных дзяцей і іх клапатлівых бацькоў” (вытрымала тры перавыданні), якая была перакладзеная на чэшскую і польскую мовы. Паводле кнігі былі падрыхтаваныя тэатральныя пастаноўкі ў Славакіі і Чэхіі.
Душан Тарагел — суаўтар (разам з Пэтэрам Пішцянэкам) зборніка апавяданняў “Сякерай і нажом” (1999; прэмія “Кніга году — 1999”), укладальнік і адзін з аўтараў кніг “Роджэр Кровіяк” (2002), анталогій эратычных апавяданняў “Сэкс па-славацку’1” (2004) і “Сэкс па-славацку’2” (2005), аўтар кнігі “Забойства як грамадская з’ява” (2006) і комікса “Янашык! Праўдзівая гісторыя” (2006; урыўкі дзвюх апошніх кніг друкаваліся па- беларуску ў часопісе “ARCHE”, №9, 2010). Напісаў сцэнар мастацкага фільма “Башчаванскі і зяць” (рэжысёр — Т. Кмач, 1995).
