№21: Знак прысутнасці

№21: Знак прысутнасці

Мы прысвячаем новы нумар “ПрайдзіСвета” феномену сувязі літаратуры і гомасэксуальнасці, альбо, кажучы мовай ХХІ стагоддзя, сувязі літаратуры і ЛГБТК. Ці застаецца літаратура літаратурай, калі адкрывае нам сусвет цялеснасці, сэксуальнасці, інтымнасці? Чаму беларуская літаратура моцная ў апісанні вайны і такая бездапаможная, стэрыльная ў апісанні цялеснасці і сэксуальнасці? Ці існуе беларуская ЛГБТК-літаратура? На гэтыя і іншыя пытанні можна будзе знайсці адказы ў нумары

Чытаць далей

Ўільям Карлас Ўільямс (William Carlos Williams)

1883 - 1963

Ўільям Карлас Ўільямс
Амерыканскі педыятр і паэт, блізкі да колаў мадэрністаў і імажыстаў, натхняльнік Біт-пакалення. Нарадзіўся 17 верасня 1883 у горадзе Рутэрфорд (штат Нью-Джэрсі) у сям’і ангельца і пуэртарыканкі франка-баскскага і нідэрландска-габрэйскага паходжання. Сярэднюю адукацыю атрымаў у Парыжы і Нью-Ёрку. У 1902 годзе паступіў на медыцынскі факультэт Універсітэта Пенсільваніі, які скончыў у 1906 годзе. Яго першая кніга Poems выйшла ў 1909 годзе.

У 1912 годзе ажаніўся з Флорэнс Херман, і яны пераехалі ў родны горад паэта Рутэрфорд, дзе да 1951 году Ўільямс працаваў доктарам. Яшчэ ва ўніверсітэце ён пасябраваў з Эзрам Паўндам, які зрабіў на паэта вялікі ўплыў і ў 1913 годзе паспрыяў выхаду ў Лондане яго другога зборніка The Tempers.

Ўільямс дасягнуў поспеху ў дзвюх асноўных галінах сваёй дзейнасці: паэзіі і медыцынскай практыцы. Таксама ён пісаў апавяданні, п’есы, раманы, эсэ і займаўся перакладамі. Удзень ён працаваў доктарам, а пісаў увечары ці ўначы.

Ўільям Карлас Ўільямс у розныя гады быў шчыльна звязаны з рознымі літаратурнымі плынямі. У пачатку паэтычнай кар’еры разам з Эзрам Паўндам і Хільдай Дулітл ён быў блізкі да імажыстаў. З 1915 году яго імя пачало асацыявацца з суполкай нью-ёркскіх авангардыстаў “Іншыя” (The Others), куды таксама ўваходзілі Ман Рэй, Ўолес Стывенс, Марыян Мур, Марсэль Дзюшан і іншыя. Падчас вандроўкі ў Еўропу пазнаёміўся з Джэймсам Джойсам.

У 1920-я Ўільямс набірае моц як яркі авангардысцкі паэт. Тады ж выходзяць дзве яго значныя кнігі — Kora in Hell (1920) і Spring and All (1923). У 1922 Т. С. Эліят выдае сваю “Бясплодную зямлю” (The Waste Land), што робіцца сенсацыяй і засланяе мадэрнісцкую эстэтыку твораў Ўільямса. Ўільямс крытыкаваў прывязанасць Эліята (ды і Паўнда) да еўрапейскай культурнай традыцыі: працягваючы свае паэтычныя эксперыменты, ён шукаў абсалютна новую паэтыку, у аснове якой ляжала б увага да паўсядзённага жыцця звычайных людзей.

У пазнейшыя гады Ўільямс зрабіўся апекуном і адвакатам маладзейшага пакалення паэтаў. Ён моцна паўплываў на прадстаўнікоў літаратурных плыняў 1950-х: бітнікі (асабліва Ален Гінзберг), Рэнесанс у Сан-Францыска, школа Блэк Маўнтэн, Нью-ёркская школа.

Акрамя вышэйзгаданых найбольш важнымі зборнікамі Ўільямса лічацца Pictures from Brueghel and Other Poems (1962) і пяцітомны эпас пра жыццё гарадка Патэрсан Paterson (1946—1958).

У 1948 годзе Ўільямс перанёс інфаркт, а пасля 1949-га перажыў яшчэ некалькі сардэчных прыступаў, лячыўся ад дэпрэсіі ў псіхіятрычнай клініцы. Памёр 4 сакавіка 1963 у сябе дома ў Рутэрфордзе.

Ўільям Карлас Ўільямс — лаўрэат амерыканскай Нацыянальнай кніжнай прэміі ў галіне паэзіі за дзве свае кнігі, а таксама пасмяротны лаўрэат Пулітцэраўскай прэміі за зборнік Pictures from Brueghel and Other Poems і ўладальнік Залатога медаля за паэтычныя творы ад Нацыянальнага інстытута мастацтва і літаратуры. Паэтычная асацыяцыя Амерыкі штогод уручае паэтычную прэмію яго імя за найлепшую кнігу вершаў.

Чытайце таксама

Андрэй Адамовіч

Андрэй Адамовіч

Беларускі паэт, аўтар зборніка "Дзень паэзіі смерці дзень". Перакладае з украінскай

Віслава Шымборска

Віслава Шымборска

Польская паэтка, эсэістка, літаратурны крытык, перакладчыца

Станіслаў Ігнацы Віткевіч

Станіслаў Ігнацы Віткевіч

Польскі мастак, фатограф, драматург, празаік, эсэіст, філосаф, тэарэтык мастацтва. Віткацы

Томас Стэрнз Эліят

Томас Стэрнз Эліят

Амерыканска-ангельскі паэт, драматург і літаратурны крытык, прадстаўнік мадэрнізму ў паэзіі. Лічыцца адным з найвялікшых паэтаў XX ст.

516