Першае месца чытачы аддалі аўтару зборніка эсэ “Працягласць кропкі” (“Протяжение точки”) Андрэю Балдзіну, другое – аўтару рамана “Журавы і Карлікі” (“Журавли и Карлики") Леаніду Юзэфовічу, трэцяе месца ў Марыям Петрасян, аўтара рамана “Дом, у якім... ” (“Дом, в котором…”).

Імёны пераможцаў чытацкага галасавання сталі вядомыя за некалькі дзён да цырымоніі ўручэння прэміі “Вялікая кніга”, якая пройдзе 26 лістапада. На цырымоніі ўганаравання лаўрэатам чытацкіх сімпатый уручаць прызы – статуэткі ў выглядзе разгорнутай кнігі.

Чытацкае галасаванне праходзіла на сайце прэміі з 23 чэрвеня па 20 лістапада 2009 году. Усяго на “Вялікую кнігу” прэтэндавалі 13 пісьменнікаў.

Расійская нацыянальная літаратурная прэмія “Вялікая кніга”, прызавы фонд якой складае 5,5 мільёнаў расійскіх рублёў, была заснаваная ў 2005 годзе. За мінулыя тры сезоны меркаванне журы і вынікі чытацкага галасавання супалі толькі аднойчы – у 2007 годзе, калі пераможцаю ў абодвух намінацыях стала Людміла Уліцкая і яе раман “Даніэль Штайн, перакладчык” (“Даниэль Штайн, переводчик”).