Бураўкін памёр у Мінску ва ўласнай кватэры. Апошнім часам ён пакутаваў на анкалагічнае захворванне.
Генадзь Бураўкін нарадзіўся 28 жніўня 1936 года ў вёсцы Шуляціна на Расоншчыне. У 1959 годзе скончыў аддзяленне журналістыкі філалагічнага факультэта БДУ. Працаваў у часопісе “Камуніст Беларусі”, у газеце “Літаратура і мастацтва”, быў карэспандэнтам “Правды” па Беларусі, галоўным рэдактарам часопіса “Маладосць”.
У 1978—1990 гг. узначальваў Дзяржтэлерадыё БССР, аднак за падтрымку дэмакратычнага руху быў звольнены з гэтай пасады і накіраваны на дыпламатычную працу. Быў сталым прадстаўніком Беларусі ў ААН, намеснікам міністра культуры і друку. Узначальваў Таварыства беларускай мовы, быў сябрам Саюза беларускіх пісьменнікаў і ПЭН-цэнтра.