Хмарка (сапр. Наталля Панамарова, у замужжы Янчанка) нарадзілася ў Мінску ў сям’і службоўца Лібава-Роменскай чыгункі, які меў дваранскае паходжанне. Скончыла агульны курс Мінскай Марыінскай жаночай гімназіі і дадатковы (“словесное отделение”) педагагічны клас (1915), беларускія лектара-інструктарскія і настаўніцкія курсы пры беларускім аддзеле Камасветы (1921), вучылася на этнолага-лінгвістычным аддзяленні педфака БДУ. Працавала ў Народным камісарыяце асветы, рэдакцыі часопіса “Зоркі”, Інстытуце беларускай культуры, Белдзяржвыдавецтве. Літаратурную дзейнасць Н. Панамарова пачала ў 1921 г. Пісала вершы і прозу для дзяцей і дарослых, друкавалася ў часопісах “Зоркі”, “Вольны сцяг”, “Полымя”, альманаху “Адраджэнне”. Аўтарка кнігі “Апавяданне старога вожыка” (1928).
