Ангельскі празаік, паэт і эсэіст. Усяго напісаў каля 80 кніг. Яго пяру належаць некалькі сотняў вершаў, 200 апавяданняў, 4000 эсэ, шэраг п'есаў, раманы. Найбольш вядомыя творы з ягонай спадчыны — метафізічны раман “Чалавек, які быў чацвяргом”, дэтэктыўныя апавяданні пра айца Браўна і хрысціянская апалагетычная праца “Вечны чалавек”.

Нарадзіўся ў Лондане. Блізка сябраваў з Хілэрам Бэлакам і настолькі часта выступаў з ім адзіным фронтам па розных пытаннях, што Бернард Шоў празваў іх “Чэстэрбэлак”. Прысвячэннем Бэлаку адкрываецца раман Чэстэртана “Напалеон з Нотынг-Хіла”.

Пра надзвычайную побытавую забыўчасць Чэстэртана хадзілі анекдоты. Так, расказвалі, што аднойчы ён адправіў з дарогі жонцы тэлеграму наступнага зместу: “Я ў Маркет Харбара. Дзе я павінен быць?” — і атрымаў варты пытання адказ: “Дома”.