Доктар паводле адукацыі, пасля заканчэння ўніверсітэта ў Утрэхце Тэлеген тры гады (1970—1973) працаваў па спецыяльнасці ў Кеніі, а потым пасяліўся ў Амстэрдаме. Да 1997 году сумяшчаў медыцынскую практыку і творчасць.
Першы зборнік паэзіі Тэлегена “Настрой біручыны” (De zin van een liguster) выйшаў у 1980 годзе (усяго на сённяшні момант пісьменнік выдаў 20 паэтычных кніг), першы зборнік казак — “Ні дня проста так: Сорак дзевяць казак пра вавёрку і іншых жывёл” (Not A Day Went By: forty-nine tales of the squirrel and other animals) — у 1984 годзе. Атрымаў шэраг літаратурных узнагародаў, у тым ліку прэстыжну прэмію Канстантэйна Хёйгенса за ўклад за развіццё нідэрландскамоўнай літаратуры (2007). На беларускую мову перакладзеныя дзве кнігі казак Тэлегена для дзяцей: “Ад усяго сэрца” (Met hart en ziel, пераклала Ганна Янкута, “Дзеяслоў” №54, 2012) і “Марудна — з усіх ног” (пераклалі Кацярына Маціеўская і Ганна Янкута; ходзяць чуткі, што зборнік неўзабаве выйдзе ў часопісе ARCHE).
