Вучылася ў ангельскім каталіцкім манастыры ў Парыжы. Аўтарка раманаў, апавяданняў, п'ес і публіцыстычных тэкстаў, яна не толькі ўзяла мужчынскі псеўданім, але публічна насіла мужчынскае адзенне. Сярод каханкаў Санд былі кампазітары Ферэнц Ліст і Фрыдэрык Шапэн (чатырнаццаць гадоў іх стасункаў апісаныя ў кнізе “Зіма на Маёрцы”, 1842) і пісьменнікі Альфрэд дэ Мюсэ і Праспэр Мэрымэ. Вядомая таксама насычаная перапіска з Гюставам Флабэрам.
Дэбютавала псіхалагічным раманам “Індыяна” (Indiana, 1832), у якім тэма жаночай эмансіпацыі цесна звязаная з праблемай свабоды чалавека. На мяжы 1830—1840-х гадоў захапілася ідэямі ўтапічнага і хрысціянскага сацыялізму. Аўтар шэрагу сацыяльных раманаў. Дэмакратычныя погляды Жорж Санд выявіліся ў цыкле вясковых аповесцяў. Удзельнічала ў рэвалюцыі 1848 году, пасля перамогі рэакцыі адышла ад палітыкі. Аўтарка мемуараў “Гісторыя майго жыцця” (1854—1855), шматлікіх раманаў, а таксама дзіцячай аповесці “Гісторыя пра Грыбуля, сапраўднага недарэку” (Histoire du véritable Gribouille, 1851).
