Аўстрыйскі паэт. Нарадзіўся 1 студзеня 1897 году ў габрэйскай сям’і. Удзельнічаў у Першай сусветнай вайне, дзе быў цяжка паранены. Вучыўся ў Венскім універсітэце. Пасля Аншлюса хаваўся, у 1939 годзе эміграваў у Вялікабрытанію. У 1957 годзе вярнуўся на радзіму, дзе неўзабаве памёр.
Шырокая вядомасць прыйшла да Крамера ў 1970-я гады, калі пачалі друкавацца яго вершы, што захаваліся ў архіве. Адзін з тамоў яго выбраных вершаў (1999) склала Герта Мюлер. Баладная лірыка Крамера блізкая да паэтыкі аўстрыйскага экспрэсіянізму. З 2001 году ўручаецца літаратурная прэмія імя Тэадора Крамера.
Тэадор Крамер выдаў зборнікі вершаў “Умоўны знак” (Die Gaunerzinke, 1929), “Каляндар” (Kalendarium, 1930), “Выгнаны з Аўстрыі” (Verbannt aus Österreich, 1943), “Пахвала адчаю” (Lob der Verzweiflung, 1972, падрыхтаваны аўтарам да друку ў 1946 годзе) і інш.
