![](http://i649.photobucket.com/albums/uu212/prajdzisvet/DSCF5153.jpg)
Андрэй Хадановіч
Пачалася вечарына з “Прадмовы” Чэслава Мілаша, перакладзенай і прачытанай Андрэем Хадановічам. Пасля яго выступіў Лявон Баршчэўскі, які прачытаў свой пераклад “Маральнага трактату” са зборніка Мілаша, што стаў ужо, як зазначыў Андрэй Хадановіч, бібліяграфічнай рэдкасцю.
![](http://i649.photobucket.com/albums/uu212/prajdzisvet/DSCF5129.jpg)
Лявон Баршчэўскі
На вечарыне выступіла шмат беларускіх перакладчыкаў з польскай мовы: Марыя Мартысевіч (якая пазнаёміла слухачоў з вершамі Баляслава Лесьмяна і Канстанты Ільдэфанса Галчыньскага), Марына Казлоўская (што разам з Марыяй Пушкінай прачытала пераклады вершаў Віславы Шымборскай, Збігнева Герберта, Тадэвуша Ружэвіча і Станіслава Бараньчака), Віталь Рыжкоў (які прачытаў верш Рышарда Крыніцкага, што апынулася вельмі дарэчы – бо акурат перад ім Марына Казлоўская прэзентавала верш Збігнева Герберта – своеасаблівы паэтычны ліст, адрасаваны Крыніцкаму), Кацярына Маціеўская і Ганна Янкута (што прачыталі вершы Кшыштафа Каміля Бачыньскага, надрукаваныя ў новым, чацвертым нумары часопіса “ПрайдзіСвет”, а таксама вершы Яна Леханя і Баляслава Лесьмяна).
![](http://i649.photobucket.com/albums/uu212/prajdzisvet/DSCF5320.jpg)
Ганна Янкута
![](http://i649.photobucket.com/albums/uu212/prajdzisvet/DSC09647.jpg)
Марыя Мартысевіч
Марына Казлоўская і Марыя Пушкіна
Андрэй Хадановіч зачытаў асобныя вершы Рафала Ваячка з кнігі “Мёртвы сезон”, пераствораныя па-беларуску Вальжынай Морт, якая не змагла прысутнічаць на вечарыне, бо жыве цяпер у ЗША. Пры канцы вечарыны зноў гучалі пераклады вершаў Чэслава Мілаша, выкананыя Андрэем Хадановічам.
![](http://i649.photobucket.com/albums/uu212/prajdzisvet/DSCF5303.jpg)
Віталь Рыжкоў
Падаецца, гэтыя літаратурныя чытанні знайшлі свайго слухача (на чацвертай вечарыне было ўжо шмат знаёмых твараў) і – свайго перакладчыка. На заўвагу Кацярыны Маціеўскай пра тое, што перакладчык, чытаючы верш, не можа проста атрымліваць эстэтычную асалоду, а заўсёды прыкідвае, як бы гэта перакласці, адгукнуліся Марыя Мартысевіч і Марына Казлоўская, і ў кожнага перакладчыка аказаўся свой самы складаны, самы цяжкі для перакладу аўтар, якога, тым не менш, немагчыма не перакласці.
![](http://i649.photobucket.com/albums/uu212/prajdzisvet/DSCF5225.jpg)
Польская паэзія, па вялікім рахунку, беларускаму чытачу вядомая мала. У нас няблага перакладзеныя ў першую чаргу “нашыя” – Міцкевіч, філаматы і філарэты, у апошнія некалькі гадоў дзякуючы Лявону Баршчэўскаму, Андрэю Хадановічу, Марыйцы Мартысевіч, Марыне Казлоўскай, Вальжыне Морт, Юрасю Бушлякову, Сержу Мінскевічу і інш. загучалі (і выйшлі) па-беларуску Мілаш, Галчыньскі, Герберт, Ваячак, Славацкі. З большасці пералічаных імёнаў бачна, што беларускія перакладчыкі ўрэшце пачалі адкрываць, без перабольшанняў, залатое стагоддзе польскай паэзіі – дваццатае.
Фота Паліна Маслянкова і Алена Пятровіч, відэа -- Паліна Маслянкова