У Польшчы выдалі ўспаміны Ларысы Геніюш
18 снежня 2012
![У Польшчы выдалі ўспаміны Ларысы Геніюш](http://i649.photobucket.com/albums/uu212/prajdzisvet/vokladka_hienijush_l_.jpg)
Да кнігі прыкладаецца дыск на беларускай мове, дзе запісаная “Споведзь”, якую чытае Народная артыстка Рэспублікі Беларусь Зінаіда Бандарэнка.
Асобнай кнігай “Споведзь” Ларысы Геніюш на роднай мове пабачыла свет у 1993 годзе. Захаваў тэкст, падрыхтаваў да друку, напісаў прадмову і каментар да першага выдання ўспамінаў паэткі беларускі даследчык Міхась Чарняўскі.
Дакументальная аповесць “Споведзь” Ларысы Геніюш — гэта кніга яе ўспамінаў пачынаючы ад Жлобаўцаў, дзе нарадзілася паэтка, і завяршаючы раздзелам “Абезь”. Цэнтральнае места ва ўспамінах паэткі займаюць сталінскія лагеры, жыццё там на нарах, мароз і цяжкая праца.
Прадмову да польскага выдання напісала польская даследчыца беларускай літаратуры Алена Глагоўская. Публікуюцца ў кнізе таксама фотаздымкі і дакументы, звязаныя з жыццём, творчасцю і дзейнасцю Ларысы Геніюш, яе мужа Янкі Геніюша, родных ім і блізкіх людзей. Некаторыя фотаздымкі надрукаваны ўпершыню.