Праца над праектам доўжыцца каля году. Аўтары бачаць яго як незалежны фільм з бюджэтам $500—1 млн. Перамовы аб фінансаванні вядуць і ва Украіне, і за мяжой. Калі спонсараў не знойдуць, Яраслаў Ладыгін плануе звярнуцца да краўдфандынгу. “Я не спадзяюся, што знайсці гэтыя сродкі будзе лёгка, — каментуе рэжысёр. — Не кожная кампанія пойдзе на рызыку па вытворчасці стужкі, дзе будзе суржык, алігархі, рэйдэры, бандыты, Данбас”. На фінансавае супрацоўніцтва з тэлеканаламі ён не разлічвае: “Звычайна прадусары пачынаюць размову з пытання, хто такі Жадан і колькі кніг ён прадаў, не ўлічваючы сітуацыі на кніжным рынку Украіны. Як і таго, што чытач пакуль арыентаваны выключна на лёгкую літаратуру”.

Аднак патэнцыял кнігі вымяраецца не продажам, перакананы Яраслаў Ладыгін. “Варашылаўград” ёсць на кожнай паліцы і добра вядомы інтэлігенцыі. Галоўнае ў гэтым рамане — яго моцная драматургічная канструкцыя, актуальнасць і кінематаграфічнасць. Рэйдэрства і барацьба з ім — гэта тэма, якая прымушае кроў кіпець”, — кажа рэжысёр.

Цяпер аўтары карціны рыхтуюць дакументальны фільм, дзе гаворыцца пра ўвасабленне іх ідэі ў жыццё і дух рамана. Стужку, якая павінная дапамагчы знайсці спонсараў, выкладуць на YouTube.

Адказваючы на пытанне пра мастацкія амбіцыі ў фільме пра Данбас, задуманы Яраславам Ладыгіным як блізкі па духу аўдыторыі братоў Коэнаў, Сяргій Жадан сказаў, што спадзяецца мінімум на “Оскар” за найлепшую ролю другога плану для выканаўцы ролі Кочы.

Кастынгу аўтары карціны яшчэ не пачыналі.

У 2010 годзе раман перамог у конкурсе “Кніга году Бі-Бі-Сі”. Пераклад рамана выдадзены ў Расіі і Германіі. Паводле рэйтынгу часопіса “Фокус”, Сяргій Жадан ўвайшоў у лік самых паспяховых украінскіх пісьменнікаў, дзе заняў 20-ю пазіцыю з сумарным гадавым накладам 11,5 тысяч асобнікаў.