Сын пісьменніка Жан заявіў, што Камю сваімі творамі і сваім жыццём адстойваў ідэалы сціпласці і выступаў супраць якой бы ні было пышнасці. Дачка Камю Катрын такасама выказала сумнеў наконт таго, ці варта пераносіць парэшткі бацькі ў Пантэон.

Да таго ж, супраць ідэі Сарказі выказаўся біёграф і сябра Камю Аліўе Тод, які абвінаваціў французскага прэзідэнта ў спробе надаць сабе палітычнай вагі ў асяродку інтэлектуалаў. “Гэта частка яго плану па сілавым захопе ўплыву сярод інтэлектуалаў. Гэта супярэчыць усяму, што адстойваў Камю”, – цытуе яго словы The Daily Telegraph.

“Сарказі няма ніякай патрэбы ў Камю. Сарказі патрэбна толькі дадаць сабе лоску”, – сказаў Тод. Па словах біёграфа, усё сваё жыццё Камю адмаўляў усялякія ўшанаванні і нават Нобелеўскую прэмію пагадзіўся прыняць толькі для таго, “каб расказаць пра лёс этнічных французаў у Алжыры”.

Нікаля Сарказі выказаў ідэю пра перапахаванне Камю ў сувязі з 50-годдзем з дня смерці пісьменніка, якое будзе адзначацца ў студзені 2010 году. У парыжскім Пантэоне, куды прэзідэнт хоча перанесці яго парэшткі, пахаваныя Эміль Заля, Віктор Гюго, а таксама Андрэ Мальро і Аляксандр Дзюма-бацька – іх парэшткі перанеслі ў Пантэон па ініцыятыве папярэдняга прэзідэнта Францыі Жака Шырака.

Для таго каб перазахаваць парэшткі Камю, прэзідэнту Францыі патрэбны дазвол родных пісьменніка. Аднак дарадцу прэзідэнта пакуль не ўдалося яго атрымаць.