Антанін Баяя нарадзіўся ў 1942 годзе ў Зліне. Скончыўшы Інстытут лясніцтва і сельскай гаспадаркі, ён пэўны час працаваў па спецыяльнасці. З 1990 года – у журналістыцы, у тым ліку на радыё “Свабода – Вольная Еўропа”. З 1996 года – выкладчык творчага пісьма ва ўніверсітэтах Аламоўца і Зліна. Сябра Чэшскага ПЭН-цэнтра.

Баяя належыць да раманістаў, якія над сваімі творамі працуюць няспешна і рупліва. Так, першы раман “Казаць срэбра” (“Mluviti stříbro”) ён выдаў у 1982 годзе, наступны – “Дуэлі” (“Duely”) – у 1988-м. У 2003 годзе ў яго выходзіць кніга “Зваўчэнне. Раманэта пра ваўкоў, людзей і знакі” (“Zvlčení. Romaneto o vlcích, lidech a úkazech”), якая была ўганараваная прэміяй “Magnesia Litera” як найлепшая празаічная кніга года. У 2007 годзе ў серыі “Чэшская калекцыя” выдавецтва Ігара Логвінава “Зваўчэнне” было надрукавана па-беларуску ў перакладзе Марыі Мартысевіч. Тады ж у рамках прэзентацыі беларускага перакладу аўтар наведаў Мінск.

У апошнім рамане Антаніна Баяі “На прыгожай блакітнай Држэўніцы” (“Na krásné modré dřevnici”) відавочныя аўтабіяграфічныя матывы. Аўтар апісвае родны Злін ад паваенных гадоў да шэрых часоў нармалізацыі, багата выкарыстоўваючы аўтэнтычныя лісты, якія ён пісаў сваёй роднай сястры.

Сябры журы, якія вырашалі лёс дзяржпрэміі, прызналі, аддаўшы свае галасы Антаніну Баяю, што пісьменнік стварыў свой вялікі раман. Дадамо толькі, што ў папярэднія гады чэшскай дзяржаўнай прэміяй ганараваліся такія літаратары, як Здэнек Ротрэкл, Людвік Вацулік, Мілан Кундэра або Квета Легатава.