№21: Знак прысутнасці

№21: Знак прысутнасці

Мы прысвячаем новы нумар “ПрайдзіСвета” феномену сувязі літаратуры і гомасэксуальнасці, альбо, кажучы мовай ХХІ стагоддзя, сувязі літаратуры і ЛГБТК. Ці застаецца літаратура літаратурай, калі адкрывае нам сусвет цялеснасці, сэксуальнасці, інтымнасці? Чаму беларуская літаратура моцная ў апісанні вайны і такая бездапаможная, стэрыльная ў апісанні цялеснасці і сэксуальнасці? Ці існуе беларуская ЛГБТК-літаратура? На гэтыя і іншыя пытанні можна будзе знайсці адказы ў нумары

Чытаць далей

Уладзімір Караткевіч у кіно

8 лістапада 2010

Уладзімір Караткевіч у кіно
Рэтраспектыва распачалася паказам мастацкага фільма “Хрыстос прызямліўся ў Гародні”. Гісторыя яго стварэння — адна з самых трагічных у савецкім кінематографе і ў жыцці кінасцэнарыста Караткевіча. Фільм перажыў 12 варыянтаў рэдакцый і больш за 20 гадоў праляжаў на цэнзурнай паліцы. Аўтар так і не пабачыў яго пры жыцці. Створаны ў 1968 годзе, ён выйшаў на экран толькі ў 1989-м — праз 5 гадоў пасля смерці пісьменніка.

Музей пакажа таксама мастацкія фільмы “Дзікае паляванне караля Стаха” (6 лістапада) і “Чорны замак Альшанскі” (13 лістапада), сцэнары да якіх напісаў У. Караткевіч. Ім будуць папярэднічаць дакументальныя стужкі, у якіх распавядаецца пра асаблівасці гэтых экранізацый. Яшчэ адзін фільм, “Маці ўрагану”, быў створаны “Беларусьфільмам” у 1990 годзе пры ўдзеле кінастудыі “Баррандаў” (Чэхаславакія) і ВА “Саюзкінасервіс”. Рэжысёр Юры Марухін зняў яго на матывах аднайменнай п’есы Караткевіча. Гэты твор пісьменніка, як зазначылі кінематаграфісты, стаў найбольш складаным для экраннага ўвасаблення. Дэманстрацыя фільма адбудзецца 20 лістапада.

Завершыцца праграма 27 лістапада паказам дакументальных і анімацыйных фільмаў. Дакументальная стужка “Сведкі вечнасці” распавядае пра дрэвы-старажылы, якія захоўваюць гістарычную памяць народа. “Памяць каменя” — пра адметныя помнікі архітэктуры, “Палескія Калядкі” — пра народныя святкаванні ў беларускіх вёсках. Сцэнары да гэтых фільмаў напісаў Караткевіч. Анімацыйныя фільмы “Ладдзя роспачы” і “Каму чорт дзетак калыша” па творах аўтара стварылі рэжысёры Алег Белаусаў і Аляксандр Ленкін. У гэты кіназбор уключылі і кароткаметражны тэлефільм “Паром” (паводле апавядання У. Караткевіча “Паром на бурнай рацэ”). Ён — пра гісторыю неспадзяванага кахання на фоне падзей паўстання 1863 года пад кіраўніцтвам Кастуся Каліноўскага. Іншыя дакументальныя стужкі прысвечаны ўжо самому аўтару, яго жыццю і творчасці.

“Цікавы ён для кожнага па-свойму, — зазначыла навуковы супрацоўнік музея Ганна Лагвіненка. — У свой час і да гэтай пары пра Уладзіміра Караткевіча кажуць у “паўтонах”, як і пра Васіля Быкава”.

Дэманстрацыя фільмаў адбываецца ў Музеі беларускага кіно кожную суботу а 15-й гадзіне. Тэл. для даведак (017) 227-10-75 (вул. Свярдлова, 4).
паводле novychas.org

Чытайце таксама

1122