№21: Знак прысутнасці

№21: Знак прысутнасці

Мы прысвячаем новы нумар “ПрайдзіСвета” феномену сувязі літаратуры і гомасэксуальнасці, альбо, кажучы мовай ХХІ стагоддзя, сувязі літаратуры і ЛГБТК. Ці застаецца літаратура літаратурай, калі адкрывае нам сусвет цялеснасці, сэксуальнасці, інтымнасці? Чаму беларуская літаратура моцная ў апісанні вайны і такая бездапаможная, стэрыльная ў апісанні цялеснасці і сэксуальнасці? Ці існуе беларуская ЛГБТК-літаратура? На гэтыя і іншыя пытанні можна будзе знайсці адказы ў нумары

Чытаць далей

У Польшчы прайшоў літаратурны семінар “Бязмежжа”

8 лістапада 2010

У Польшчы прайшоў літаратурны семінар “Бязмежжа”
Прачытаць свае творы, паслухаць іншых, абмеркаваць сітуацыю беларускай літаратуры і выдавецкай справы па абодва бакі мяжы, запланаваць супольныя праекты – такія задачы стаялі перад удзельнікамі 14-га "Бязмежжа". З беларускага боку ў семінары ўдзельнічалі празаік і галоўны рэдактар часопіса “Дзеяслоў” Барыс Пятровіч, паэт і перакладчык, старшыня Беларускага ПЭН-Цэнтру Андрэй Хадановіч, паэт Анатоль Івашчанка, пісьменнік і перакладчык Павал Касцюкевіч, перакладчыца, сябра рэдакцыі часопіса “ПрайдзіСвет” Юля Цімафеева і музыка Алесь Зайцаў. Беларускую культурную эліту Падляшша прадставілі паэт і галоўны рэдактар тыднёвіка “Ніва” Яўген Вапа, пісьменнік Міхась Андрасюк, паэткі Надзея Артымовіч і Міра Лукша, журналістка Ганна Кандрацюк, гісторык Алесь Латышонак, паэт Віктар Стахвюк, выдаўцы Дарафей Фіёнік і Марцін Рэмбач.

Падчас свайго візіту на Падляшша ўдзельнікі семінару наведалі Беларускі ліцэй у Бельску Падляшскім, сустрэліся з выдаўцамі беларускай літаратуры на Падляшшы, з даследчыкамі і гісторыкамі, абмеркавалі праблемы, з якімі сутыкаюцца беларускія літаратары па той і гэты бок беларуска-польскай мяжы, наведалі галерэю імя Тамары Саланевіч у Нараўцы, а таксама Беларускі музей ў Гайнаўцы.

Па словах арганізатара семінару, рэдактара тыднёвіка "Ніва" Яўгена Вапы, праграма сёлетняга мерапрыемства выканана цалкам, і ўжо ёсць планы на будучыню:

– Здзейсніліся ўсе планы, звязаныя з выдавецкай дзейнасцю, і гэта самае галоўнае, усё, што запланавалі разам з Барысам Пятровічам, сёлета прайшло выдатна і я з гэтага проста цешуся. У наступным годзе хочацца яшчэ дзве-тры такія кніжкі паказаць, асабліва апошнім часам мы бачым Міру Лукшу, яна ёсць паэткай, выдадзім яе зборнік. Каб у наступных нумарах "Дзеяслова" было больш нашых беластоцкіх пісьменнікаў.

Падчас сёлетняга “Бязмежжа” былі прэзентаваныя новыя выданні як з Беларусі так і з Падляшша, між іншым – кнігі Міхася Андрасюка, адна выдадзеная ў Польшчы па-польску, другая – у Беларусі па-беларуску, а таксама найноўшая кніга Ганны Кандрацюк-Свярубскай "Дзядоўскае турнэ з Анатолем С." А таксама для польскіх літаратараў прайшла прэзентацыя чаасопіса перакладной літаратуры "ПрайдзіСвет".
паводле racyja.com

Чытайце таксама

529