Перамога Гордан, якая не карыстаецца вялікай папулярнасцю сярод шырокай публікі, стала нечаканасцю для многіх. Да цырымоніі ўганаравання галоўнымі прэтэндэнтамі на ўзнагароду лічыліся Лаянэл Шрайвер (раман So Much for That) і Ніколь Краўс (Great House). Сама Гордан, каментуючы прысуджэнні ёй прэміі, таксама прызналася, што не чакала такога павароту падзей.

Найлепшым творам у намінацыі "Дакументальная літаратура" журы палічыла мемуары спявачкі і паэткі Пэці Сміт пра Нью-Ёрк 1960-х гадоў. Гаворачы пра свой поспех, Сміт расказала, што ў тыя гады, працуючы ў кніжнай краме, часам задумвалася, як гэта – атрымаць Нацыянальную кніжную прэмію. "Дзякую вам за тое, што дапамаглі мне высветліць гэта", – падзякавала журы пісьменніца.

Кэтрын Эрскін атрымала прэмію ў намінацыі "Літаратура для дзяцей" за раман Mockingbird. Тэрэнс Хейз са зборнікам вершаў Lighthead атрымаў узнагароду ў катэгорыі "Паэзія". Ганаровую прэмію за "ыыбітнае служэнне амерыканскай літаратурнай грамадзе" ўручылі Тому Вулфу, а таксама Джоан Ганзы Куні, адной са стваральніц Sesame Street ("Вуліцы Сезам").

Нацыянальная кніжная прэмія (National Book Award) – адна з самых прэстыжных літаратурных узнагародаў ЗША, разам з Пулітцэраўскай прэміяй. У 2010 годзе Нацыянальная кніжная прэмія была прысуджаная ў 61-ы раз. Лаўрэатам прэміі ўручаюць бронзавыя статуэткі і чэкі на 10 тысяч даляраў.