Спадкаемцы знакамітага пісьменніка афіцыйна дазволілі аўтару папулярных на Туманным Альбіёне гісторый пра юнага шпіёна Алекса Райдэра “напісаць раман пра дэтэктыва з Бэйкер-стрыт” – упершыню з 1915 года. Па словах самога Хоравіца, “ён проста не змог адмовіцца ад такой магчымасці”.

“Я літаральна закахаўся ў творчасць Дойла яшчэ ў 16 гадоў, – расказаў пісьменнік у інтэрв'ю агенцтву Рэйтэр. – З тых часоў я не раз перачытваў кнігі пра прыгоды Холмса і вельмі рады, што мне даецца шанец вярнуць яго да жыцця”.

Чакаецца, што раман апублікуе брытанскі выдавецкі дом “Арыён” у верасні гэтага года. Энтані Хоравіц ужо заявіў, што плануе стварыць “першакласную гісторыю для новага пакалення чытачоў”, прытрымліваючыся пры гэтым “духу арыгінальнага твору Артура Конана Дойла”.