На працягу 17 дзён у Старым Арсенале ў Кіеве на плошчы больш за 500 квадратных метраў будзе прадстаўленая вялікая мультыдысцыплінарная праграма, у тым ліку сучасная акадэмічная і электраакустычная музыка, джаз, рок, сусветная класіка, экспазіцыя сучаснага мастацтва, тэатр, сучасны танец, артхаўс і дакументальнае кіно. Адначасна з канцэртамі, спектаклямі, экспазіцыямі будзе прапанаваная адукацыйная праграма, у прыватнасці прэзентацыі кніг, сустрэчы з пісьменнікамі, чытанні, лекцыі і майстар-класы.

Сваю праграму на форуме прадставяць каманды "Джаз Кактэбель", Moloko, Dutch Putch, "Маладосць" і "Адкрытая ноч". У межах фестывалю ўпершыню адбудзецца шоў-кейс украінскага тэатральнага мастацтва для дырэктараў і прадусараў расійскіх і заходніх фестываляў.

У “ГогальFest” возьмуць удзел праекты з 16 краінаў, у тым ліку з Францыі, Германіі, Гішпаніі, Бразіліі, Італіі, Швейцарыі, ЗША, Партугаліі, Балгарыі і іншых краінаў.

“ГогальFest” не толькі закліканы зрабіць "Мистецький Арсенал" (культурна-мастацкі і музейны комплекс, дзе адбудзецца фестываль) адным з магутных цэнтраў фестывальнага руху, але і стварыць на яго базе дзейны цэнтр развіцця сучасных мастацтваў, у якім будуць праводзіць заняткі майстры сусветнага значэння і які стане асновай для стварэння нацыянальнай канкурэнтназдольнай школы сучаснага мастацтва.