Сваім праектам Брукс вырашыў звярнуць увагу не толькі на небяспеку знікнення моваў, але і на пагрозу вымірання алфавітаў, якіх цяпер налічваецца менш за сотню. Такія формы пісьменства зразумелыя некалькім дарослым людзям, іх не вывучаюць у школе і практычна не выкарыстоўваюць.

Усяго на выставе прадстаўлена 14 кляновых дошчачак, на якіх выразаныя знакі з выміраючых алфавітаў, у прыватнасці, складовай азбукі чэрокі і пісьменнасці інуіцкіх дыялектаў Канады. Акрамя таго, у бібліятэцы выстаўленая кніга, прысвечаная даследаванню Брукса.

Як адзначаецца на афіцыйным сайце праекту, на ўсіх дошчачках напісаны аднолькавы тэкст — артыкул 1 з Усеагульнай дэкларацыі правоў чалавека, прынятай у ААН у 1948 годзе: “Усе людзі нараджаюцца свабоднымі і роўнымі ў сваёй годнасці i правах. Яны надзеленыя розумам і сумленнем і павінныя ставіцца адно да аднаго ў духу братэрства”.

Частку выстаўленых аб'ектаў можна паглядзець тут.

Праект “Выміраючыя алфавіты” ўпершыню быў прадстаўлены ў 2010 годзе ва Ўэльсе на штогадовай канферэнцыі, прысвечанай занядбаным мовам. Пасля калекцыя Брукса выстаўлялася ў некалькіх універсітэтах.

У свеце налічваецца ад 6 да 7 тысяч моваў, пры гэтым больш за 2 тысячы з іх знаходзяцца на мяжы знікнення.