Школьнікі горада Маале-Адумім паклапоцяцца пра тое, каб гіганты, якія маюць недахоп адпаведных па памеры кніг, таксама змаглі чытаць.

Кніга з прадказальнай назвай “Гіганцкая кніга” расказвае пра волата, які праз свае вялізныя памеры ніяк не можа падабраць сабе для чытання кнігу адпаведных памераў. Яе вышыня — 2 метры, шырыня — больш за метр.

Больш за 13 школ бяруць удзел у праекце Цэнтра ангельскай пісьменнасці ў Ерусаліме, дапамагаючы ствараць дызайн і напаўненне кнігі. Вокладку для кнігі зрабіў аўтар дзіцячых кніг і ілюстратар Нэтанэль Эпштэйн. Пасля таго як праца над кнігай будзе завершаная, тая паедзе ў турнэ па школах Ізраіля.

Гэтую незвычайную акцыю ініцыявалі супрацоўнікі “AHAVA”, што клапоцяцца пра павышэнне ўзроўню ведаў ангельскай мовы ў ізраільцян. Стварэнне гіганцкай кнігі прымеркаванае да пачатку штогадовага марафону англамоўнага чытання.

Робячы найбуйнейшую ў гісторыі Ізраіля кнігу, супрацоўнікі “AHAVA” спадзяюцца захапіць мясцовых школьнікаў і выклікаць у іх большую цікавасць і задавальненне ад чытання на ангельскай мове.