Выступаючы падчас прэзентацыі сваёй новай кнігі “Каін” (Caim), якая ўяўляе сабой іранічны пераказ біблейнай гісторыі Каіна, сына Адама і Евы, Жазэ Сарамагу заявіў, што грамадства, магчыма, было б лепшым без Бібліі. Прадстаўнікі рыма-каталіцкай царквы назвалі яго выказванні “рэкламным ходам”.

“Біблія – гэта падручнік па амаральнасці, што мае моцны ўплыў на нашу культуру і нават на лад нашага жыцця. Без Бібліі мы былі б іншымі і, магчыма, лепшымі людзьмі”, – перадае яго словы агенцтва навінаў Lusa. Таксама Сарамагу раскрытыкаваў “жорсткага, зайздроснага і невыноснага Бога, які існуе адно ў нашых галовах”. Аднак ён не лічыць, што яго кніга ў нейкай ступені можа абразіць каталікоў, “таму што яны не чытаюць Біблію”. “Яна можа абразіць габрэяў, але гэта для мяне няважна”, – дадаў ён.

Айцец Мануэль Маружау, прэс-сакратар Епіскапскай канферэнцыі Партугаліі, даў наступную ацэнку выказванням раманіста: “Такі пісьменнік, як Сарамагу, мае поўнае права на крытыку, аднак абразы яшчэ нікому не дадавалі гонару, асабліва лаўрэату Нобелеўскай прэміі”.

Рабін Эліезэ Марцінэ, прэс-сакратар габрэйскай грамады ў Лісабоне, таксама пракаментаваў словы пісьменніка наконт габрэяў, адзначыўшы, што габрэйскі свет не будзе шакаваны ні творамі Сарамагу, ні каго-небудзь іншага. “Сарамагу не ведае Бібліі, – сказаў рабін, – ён разумее яе адно павярхоўна”.

Рэлігійны скандал з удзелам Жазэ Сарамагу ўжо меў месца раней. Тады прычынай сталася яго “Евангелле ад Ісуса”. Кніга выяўляла, як Хрыстос страчвае цнатлівасць з Марыяй Магдаленай, а Бог выкарыстоўвае яго для таго, каб кіраваць светам.