Прыкладна такім чынам кнігавыдаўцам прапаноўвалася змагацца са зніжэннем попыту на літаратуру – маўляў, адну кнігу могуць прачытаць шмат разоў, і прытым розныя людзі. Што, зразумела, зніжае прыбытковасць кнігавыдавецкіх прадпрыемстваў, і нават, здараецца, прымушае іх цярпець страты. Аднаразовыя кнігі павінны былі вярнуць да нормы зніжаны попыт на кнігі.

Але вядома, што фантастычныя ідэі нярэдка спраўджваюцца. Асабліва, калі для гэтага ёсць тэхнічная база і эканамічны попыт на ўвасобленую ідэю. Хай нават у межах канцэпту.

Менавіта такі канцэпт кнігі быў нядаўна прадстаўлены незалежным аргентынскім выдавецтвам Eterna Cadencia. Анталогія маладых аўтараў "El Libro Que No Puede Esperar" ("Кніга, што не чакае") была надрукаваная адмысловым чарнілам, якое за некалькі гадзін знікае з паперы пад уздзеяннем паветра і святла. Зразумела, толькі што надрукаваныя асобнікі неадкладна змяшчаюцца ў герметычную ўпакоўку і ў такім выглядзе адпраўляюцца ў кніжныя крамы.

Такім незвычайным чынам выдавецтва вырашыла прыцягнуць увагу чытачоў да творчасці маладых літаратараў і аўтараў-пачаткоўцаў, яшчэ невядомых шырокай публіцы. Выдавецкі каментар да гэтай кнігі абвяшчае, што зроблена гэта было для таго, каб стымуляваць людзей адразу пачынаць чытаць набытыя кнігі, а не адкладаць іх на месяцы і гады. Менавіта ў такім блізкім да прымусовага парадку, на думку выдаўцоў, можна пазнаёміць чытача з новымі аўтарамі, якія не маюць магчымасці чакаць гадамі свайго прызнання.