Рускі паэт, перакладчык, тэарэтык і прапагандыст верлібра.
Нарадзіўся 6 жніўня 1932 году ў Аляксандраўск-Грушаўскім, вырас у Харкаве. Скончыў факультэт журналістыкі МДУ (1955), працаваў рэдактарам у выдавецтве “Маладая гвардыя”. Эпізадычна друкаваў вершы з 1961 году, аднак сур’ёзную вядомасць атрымаў толькі ў 1980—1990 гг., калі з’явіліся першыя зборнікі рускага верлібра “Белы квадрат” і “Час Ікс”, а пасля Анталогія рускага верлібра. Быў адным з тэарэтыкаў верлібра (самы вядомы артыкул — “Ад чаго вольны вольны верш”, надрукаваны ў часопісе “Пытанні літаратуры” ў 1972 годзе. Перакладаў на рускую мову паэзію ХХ стагоддзя, перш за ўсё польскую і югаслаўскую. Узнагароджаны медалём польскага Міністэрства культуры, літаратурнай прэміяй Югаславіі “Залаты ключ Смедэрэва”.
Памёр 26 жніўня 1994 году ў Македоніі.
