Нарадзілася ў Ружанах. Дзявочае прозвішча — Пінс. Паходзіць з высакароднай габрэйскай сям’і, продкі былі выбітнымі дзеячамі габрэйскай супольнасці. Бацька, Ехіэль Міхл Пінс, быў рабінам у Ружанах, а потым, у 1870-я, быў прызначаны ў камітэт Мошэ Монтэфіёрэ і займаўся арганізацыяй ашкеназскага паселішча (ішува) у Ізраілі, куды ў 1881 — 1882 гг. перавёз сям’ю і зрабіўся адным з першых сіяністаў і прадвеснікаў стварэння дзяржавы Ізраіль. У Ізраілі Іта выйшла замуж за Давіда Еліна, выбітнага грамадскага і палітычнага дзеяча Ізраіля. Яе мемуары “Дні майго дзяцінства” выйшлі ў Ерусаліме ў 1938 г.