Дацкі паэт, празаік і публіцыст. Нарадзіўся на дацкім востраве Фюн, вучыўся ў Капенгагенскім універсітэце. На яго раннюю творчасць моцна паўплываў Герг Брандэс і рускія нігілісты, што заклікалі развеяць змрок хрысціянства. Цікавіўся творчасцю сучасных яму натуралістаў, сімвалістаў і містыкаў, асабліва Гюісманса і Метэрлінка.
Першы зборнік вершаў выдаў у 1887, зрабіўся папулярным як аўтар лірычнай паэзіі. Неўзабаве перайшоў да сімвалізму, а ў 1895 годзе адмежаваўся ад сваіх папярэдніх поглядаў. Творчасць яго позняга перыяду прасякнутая каталіцкімі матывамі. Шырока вядомы сваімі біяграфіямі каталіцкіх святых.
