Наля (Анастасія) Маркава (у замужжы Хмара) нарадзілася 25 снежня 1906 г. у вёсцы Хатоўня Быхаўскага павета Магілёўскай губерні (цяпер Рагачоўскі раён Гомельскай вобласці) у сялянскай сям’і. Скончыла Магілёўскі педтэхнікум (1927). У 1925—1928 гг. была сяброўкай Магілёўскай філіі “Маладняка”, удзельнічала ў працы І з’езда гэтай арганізацыі. У 1929 г. пераехала да мужа ў Ленінград, дзе скончыла Ленінградскі педінстытут (1934). Працавала загадчыцай піянерскага клуба, выхавацелькай дзіцячага садка, дырэктарам школ, выкладчыцай рускай мовы і літаратуры. З 1962 г. — на пенсіі. Узнагароджаная медалямі.
Першы надрукаваны верш Н. Маркавай “У вёску” з’явіўся ў 1925 г. у газеце “Магілёўскі селянін”. Друкавалася таксама ў часопісах “Маладняк”, “Чырвоны Сейбіт”, “Полымя”, газетах “Савецкая Беларусь”, “Чырвоная змена”, літаратурных зборніках “Дняпроўскія ўсплёскі” і “Ранне”. У часы маладосці Наля Маркава сябравала з вядомым паэтам Уладзімірам Дубоўкам, які прысвяціў ёй свой зборнік вершаў “Наля” (1927).
