Афраамерыканская паэтка-лесбіянка і актывістка. Нарадзілася ў Х'юстане (Тэхас, ЗША) у сям’і прыслугі і аўтамеханіка. Была наймалодшай з чатырох сясцёр. У 17 гадоў сышла з дому, каб паступіць у каледж. Cкончыла Гарадскі каледж Лос-Анджэлеса і Дзяржаўны каледж Сан-Францыска. Была двойчы замужам: за драматургам Эдам Булінсам, які збіваў яе і якога яна “баялася да смерці”, і за пісьменнікам і выдаўцом Робертам Ф. Паркерам, з якім таксама развялася, зразумеўшы, што “ідэя шлюбу... для мяне не працуе”. У канцы 1960-х яна пачала ідэнтыфікаваць сябе як лесбіянка, яе партнёркай да канца жыцця была Марці Данхэм.
У 1963 годзе адбыўся першы публічны паэтычны выступ Пэт Паркер, у 1968-м яна пачала чытаць свае вершы ў жаночых гуртках пры жаночых кнігарнях, кавярнях і на фемінісцкіх імпрэзах. У 1969 годзе пазнаёмілася з Одры Лорд (Audre Lorde), адной з самых значных чарнаскурых паэтак-лесбіянак. Яны абменьваліся лістамі і натхнялі адна адну на творчасць да самай смерці Пэт Паркер. Першы паэтычны зборнік Паркер з’явіўся ў 1972 годзе, у 1999 годзе ў Нью-Ёрку выйшаў поўны збор яе паэтычных твораў.
Пэт Паркер удзельнічала ў палітычнай арганізацыі “Чорныя пантэры”, была вельмі актыўнай у амерыканскім фемінісцкім руху, у ЛГБТК-руху. У 1980-м Пэт Паркер арганізавала Рэвалюцыйную раду чарнаскурых жанчын.
Памерла паэтка ў 1989 годзе ад раку грудзей. Паэтычная прэмія яе імя ўручаецца за найлепшы апавядальны верлібр ці драматычны маналог, выкананы чарнаскурай паэткай-лесбіянкай.
