![Янка Запруднік](/assets/components/phpthumbof/cache/zaprudnik.5bb011cbc2964a802ed84d01221794ac.jpg)
Беларуска-амерыканскі гісторык і публіцыст, актыўны дзеяч беларускай дыяспары ў ЗША.
Сапраўднае імя — Сяргей Вільчыцкі. Нарадзіўся ў мястэчку Мір (цяпер Карэліцкі раён). У 1942 годзе скончыў пачатковую школу ў Міры, а ў Баранавічах — прагімназію і тры курсы гандлёвай школы. Належаў да Саюза беларускай моладзі. З 1944 года ў Германіі, служыў у нямецкім войску, пасля заканчэння вайны да траўня 1946 знаходзіўся ў лагеры ваеннапалонных у амерыканскай зоне акупацыі.
Каб застацца ў беларускім лагеры ў Рэгенсбургу і атрымаць статус “перамешчанай асобы”, якога былы ваеннапалонны ніяк не мог мець, узяў прозвішча Янка Запруднік, захаваўшы яго на ўсё жыццё.
У 1948 выправіўся працаваць у шахты Вялікабрытаніі. У 1954 годзе скончыў гістарычны факультэт Лёвенскага каталіцкага ўніверсітэта ў Бельгіі. З 1957 году жыве і працуе ў ЗША.
У 1969 г. у Нью-ёркскім універсітэце абараніў дысертацыю, атрымаўшы ступень доктара гістарычных навук. Выкладаў гісторыю Расіі і СССР у Квінскім каледжы Нью-Ёркскага гарадскога ўніверсітэта (1970—1975), гісторыю і сучасную палітыку Беларусі ў Калумбійскім універсітэце (1994).