пратанчыўшы з табою ўсю ноч
(etter å ha dansa med deg hele natta)
дадому
уздоўж тратуара
марозная смуга над прыстанню
чоўны — фіялетавыя цені
халодна
і трошку святла
у грудзях
адлегласць
(avstand)
вібруюць
мембраны
паміж двума целамі
усё, што было
жыве ў нашай памяці
што мы рабілі
і што не рабілі ніколі
не міргаючы
(uten å blunke)
ляжу на спіне
пасярод падлогі
з распасцёртымі рукамі
як Ісус у 33
утаропіўшыся ў рэзкае святло лямпы
не міргаючы
дзяўчо чэрпае лыжкай
з пустога рондаля
цікава, ці зменіцца нешта
калі застануся ляжаць так
першы
(først)
яна пытаецца
чаму мы нараджаемся
і я не ведаю
але не думаючы
цалую ейную спіну
высока-высока
першы
раз
потым двойчы
цяпер зразумела
(jeg forstår det nå)
нельга трымаць
на адлегласці нешта
трэба цалкам адкрыцца
і проста прыняць
узяць да сябе
што б там ні было
і любіць
