Вацлаў Ластоўскі (1883–1938), грамадскі і палітычны дзеяч, пісьменнік, гісторык, філолаг, этнограф, нарадзіўся ў засценку Калеснікава Дзісненскага павета.
Друкаваўся з 1909 (псеўд. Власт, Юры Верашчака, Арцём Музыка, Сваяк, Палачанін, Ю. Сулімірскі і інш.). Аўтар гістарычнай аповесці "Лабірынты" (1923), сцэнічнага эпізода з жыцця Ф. Скарыны ("Адзінокі", 1923). Складаў чытанкі для дзяцей. Апрацоўваў гістарычныя легенды. Аўтар апавяданняў, артыкулаў пра С. Палуяна, П. Багрыма, Ц. Бычкоўскага, К. Каліноўскага, В. Цяпінскага і інш., успамінаў пра М. Багдановіча, Я. Купалу, "нашаніўскі перыяд". Перакладаў з рускай (А. Талстой), англійскай (Р. Кіплінг, Б. Мэон), польскай (Э. Ажэшка, А. Валодзьскі, К. Тэтмаер), дацкай (Х. К. Андэрсен) і іншых моваў. Многія пераклады Вацлава Ластоўскага пад рознымі псеўданімамі друкаваліся ў часопісе “Крывіч”, які ён сам жа рэдагаваў.
У анталогіі М. Скоблы “Галасы з-за небакраю” змешчаны пераклад Ластоўскага верша Аляксея Талстога “Чужое гора”.
