Разам з кнігай у набор уваходзіць і маленькая пальчыкавая лялька аднаго з герояў кнігі. Лічыцца, што бацькі змогуць пагуляць з дзіцем у персанажаў кнігі пасля чытання. Спецыяльна для гэтай акцыі выдавецтва HarperCollins збіраецца выдаць 9 мільёнаў кніг, якія на працягу 4-х тыдняў будуць трапляць да брытанскіх дзяцей у скрыначцы з Happy Meal.

Рэакцыя брытанскай грамадскасці на эксперымент неадназначная. Шматлікія крытыкі — у тым ліку дырэктар кампаніі здаровага дзіцячага харчавання Чарлі Паўэл — лічаць, што McDonald's папросту спекулюе на дзецях. Яго галоўны аргумент: у той час як брытанскія школьнікі масава пакутуюць на атлусценне, сусветны лідар фаст-фуду выкарыстоўвае кнігі, каб яшчэ больш трывала “падсадзіць” дзяцей на нездаровае харчаванне.

З іншага боку, акцыю McDonald's ухваліў дабрачынны фонд National Literacy Trust. Паводле дадзеных фонду, прыкладна 4 мільёны брытанскіх дзяцей не маюць кніжак, альбо кніжкі ёсць, але бацькі ім нічога не чытаюць. У святле такіх фактаў дырэктар National Literacy Trust мяркуе, што магчымую шкоду ад харчавання ў McDonald's нівелююць станоўчыя наступствы эксперыменту — бо вельмі важна зноў прышчапіць дзецям і іх бацькам любоў да чытання.