Навіны літаратуры

26 сакавіка 2013

Адам Глобус уручыць сваю “Залатую літару”

У імпрэзе возьмуць удзел: заснавальнік прэміі Адам Глобус, намінанты на прэмію, іншыя літаратары. Сёлета ў шорт-лісце “Залатой літары” 5 кніг: Валянцін Акудовіч “Кніга пра нішто”; Уладзімір Арлоў “Пакуль ляціць страла”; Алесь Бяляцкі “Асвечаныя беларушчынай”; Сяргей Календа “Кантынентальны сняданак”; Наста Манцэвіч “Птушкі”. Пачатак у 18.30. Пра прэмію: “Залатая літара” — штогадовая літаратурная прэмія, якую ўручае пісьменнік Адам Глобус за найлепшую кнігу году. Уручаецца з 2004. Уганараванне традыцыйна адбываецца ў сакавіку і праходзіць у маленькіх кавярнях і кнігарнях Мінска. Лаўрэатамі прэміі ў розныя гады рабіліся Сяргей Харэўскі, Уладзімір Арлоў, Ігар Бабкоў, Андрэй Федарэнка. Памер прэміі складае сто еўра.

Чытаць цалкам

25 сакавіка 2013

Найцікавейшыя чэшскія кнігі прэзентуюць у галерэі “Ў”

Прэзентацыя твораў чэшскай літаратуры як сусветна вядомых класікаў, так і сучасных папулярных аўтараў у дыхтоўных беларускіх перакладах:• Багуміл Грабал. Я абслугоўваў ангельскага караля (раман); • Эган Бонды. Запрашэнне на вячэру (выбраныя творы); • Міхал Вівэг. Цудоўныя гады сабаку пад хвост (раман); • Ірэна Доўскава. Моцны Жбуць (раман). У прэзентацыі бяруць удзел перакладчыкі і рэдактары Вераніка Бяльковіч, Ганна Янкута, Лявон Баршчэўскі, Віктар Жыбуль і віртуальны Макс Шчур. Урыўкі з твораў прачытаюць Ганна Хітрык і Павел Харланчук. Вядоўца — куратар серыі “Чэшская калекцыя” Сяргей Сматрычэнка. Пачатак а 19-й. Уваход вольны.

Чытаць цалкам

23 сакавіка 2013

Памёр класік афрыканскай літаратуры Чынуа Ачэбэ

Як піша The Independent, Ачэбэ памёр у шпіталі, куды трапіў праз кепскае самаадчуванне ў пачатку тыдня. Чынуа Ачэбэ зрабіўся сусветна вядомым пасля выхаду рамана “Things Fall Apart”. Кніга выйшла ў 1958 годзе і стала самай чытанай у Афрыцы. Агулам яна была перакладзеная больш чым на 50 моваў і прададзеная тыражом больш за 10 мільёнаў копій. У 2007 годзе Ачэбэ атрымаў літаратурную прэмію “Міжнародны Букер” за ўнёсак у сусветную літаратуру. Чынуа Ачэбэ быў адным з першых студэнтаў Ібаданскага ўніверсітэта, заснаванага ў 1948 годзе. Ён пачаў вывучаць медыцыну, аднак затым пераключыўся на ангельскую гісторыю і багаслоўе. Пасля заканчэння ўніверсітэта пачаў у ім выкладаць. У канцы 1960-х Чынуа Ачэбэ быў дыпламатам у самаабвешчанай рэспубліцы Біяфра. Акрамя таго, працаваў на радыё. У 1990-х пісьменнік пераехаў у ЗША. Ён напісаў больш за 20 кніг, сярод якіх раманы “Arrow of God” (1964), “A Man of the People” (1966). Ачэбэ выкладаў літаратуру, у яго было некалькі дзясяткаў ступеняў ва ўніверсітэтах…

Чытаць цалкам

22 сакавіка 2013

Перспектывы беларускай перакладной літаратуры абмяркуюць 27 сакавіка

У межах фестывалю сярэднееўрапейскай літаратуры “Шэнгенка” запрашаюцца арганізатары актуальных перакладчыцкіх ініцыятываў, кнігавыдаўцы, эксперты да супольнай дыскусіі і акрэслення перспектываў што да развіцця рынку перакладной літаратуры ў Беларусі. Удзельнікі могуць прадставіць экспертную пазіцыю, выказаць сваё меркаванне ў дыскусіі, а галоўнае — паспрабаваць выпрацаваць супольныя падыходы да развіцця сітуацыі і заключыць паміж сабой адпаведныя пагадненні. Прапануецца разгляд пытанняў у межах двух тэматычных блокаў: 1. Перакладная літаратура (мастацкая і навуковая) у Беларусі: аналітыка і ацэнка сітуацыі. Якое месца займае напрацаваны сегмент перакладаў і выданняў кніг на беларускай мове сярод аналагічных перакладчыцкіх праектаў на рускай мове? Ці існуе тут канкурэнцыя альбо паралельнае існаванне двух рынкаў? Якія задачы ставяць перад сабой асобы (калектывы, супольнасці), уключаныя у перакладчыцка-выдавецкую дзейнасць? Чым гэтая дзейнасць матываваная? Ці ёсць ад яе плён, асабісты ці супольны?…

Чытаць цалкам

22 сакавіка 2013

“Дэбютанты” году: Андрэй Адамовіч, Юлія Шарова і Ганна Янкута

Вядоўца вечарыны, паэт, перакладчык, старшыня Беларускага ПЭН-Цэнтра Андрэй Хадановіч паведаміў, што сёлета ў межах прэміі ёсць спецыяльныя адзнакі — будзе ўручана дзесяць узнагародаў і адзін медаль. Пісьменнік, сябра журы Уладзімір Арлоў у сваім выступе заўважыў, што бурлівыя публічныя абмеркаванні прэмій — нядаўна ўручанай імя Гедройца і цяпер імя Багдановіча — абвастраюць падзеі літаратурнага працэсу. Спадар Уладзімір запрасіў на сцэну заснавальніка прэміі “Дэбют” Паўла Бераговіча, які быў уганараваны медалём з партрэтам Максіма Багдановіча як фундатар прэміі. Андрэй Хадановіч у алфавітным парадку прадставіў фіналістаў у намінацыі “Мастацкі пераклад”. Святлана Богуш расказала пра перакладзеную ёй са славацкай мовы кнігу Рудольфа Слобады “Розум” і агучыла фрагмент. Павел Рааго расказаў пра сваю працу над перакладам рамана Жо Лангеравай “Калісьці ў Браціславе. Маё жыццё з Оскарам Л”. Пісьменнік, першы намеснік старшыні ГА “Саюз беларускіх пісьменнікаў” Алесь Пашкевіч, а таксама выдавец…

Чытаць цалкам

18 сакавіка 2013

Расійскую прэмію Белкіна атрымала Ірына Павалоцкая

Сёлета, паводле словаў каардынатара прэміі Наталлі Івановай, журы цікавіла развіццё сапраўдных пушкінскіх традыцый. Іванова падкрэсліла, што твор-пераможца — гэта сапраўдная літаратура, якая “застанецца з намі”. Лаўрэат атрымала грашовую ўзнагароду ў памеры 150 тысяч расійскіх рублёў. Астатнія фіналісты атрымаюць па 50 тысяч. Цырымонія ўзнагароджання прайшла 13 сакавіка. Прэмія Белкіна была заснаваная ў 2001 годзе фондам “Руская літаратурная ініцыятыва”, які ўзначальвае крытык і публіцыст Наталля Іванова. Адзіную прэмію, названую ў гонар выдуманага героя, падтрымлівае фонд Барыса Ельцына. У журы прэміі заўсёды ўваходзяць пяць чалавек — па колькасці аповесцяў Белкіна.

Чытаць цалкам

18 сакавіка 2013

“Азіяцкага Букера” ўпершыню ўручылі пісьменніку з Малайзіі

Журы прэміі адзначыла стылістычныя вартасці кнігі, якая расказвае пра Малайзію падчас японскай акупацыі. Раман Тан Тван Энга ў 2012 годзе таксама прайшоў у шорт-ліст брытанскага Букера, аднак узнагароду ў выніку атрымала пісьменніца Хілары Мэнтэл. Акрамя Тан Тван Энга на “азіяцкага Букера” прэтэндавалі яшчэ чатыры пісьменнікі, у тым ліку Архан Памук з раманам “Дом цішыні”, які на ангельскую быў перакладзены ўпершыню ў мінулым годзе, хоць быў напісаны яшчэ ў 1983-м. The Man Asian Literary Prize уручаецца пісьменнікам з краін Азіі, чые творы былі перакладзеныя на ангельскую або напісаныя на ёй цягам папярэдняга каляндарнага году. Прэмія ўпершыню была ўручаная ў 2007 годзе, тады яе ўладальнікам стаў кітайскі пісьменнік Цзян Ронг за раман “Ваўчыны татэм”. У 2013 годзе прэмія зменіць назву і будзе называцца Asian Literary Prize, бо група кампаній Man яе больш не спансуе.

Чытаць цалкам

18 сакавіка 2013

Галоўных дэбютантаў за 2012 год назавуць 21 сакавіка

Пачатак а 19-й. У намінацыі “Паэзія” — Андрэй Адамовіч, Кацярына Макарэвіч, Наста Манцэвіч. У намінацыі “Проза” — Андрэй Пакроўскі, Юлія Шарова, Ксенія Шталянкова. У намінацыі “Пераклад” — Святлана Богуш, Павел Рааго, Ганна Янкута. Уваход вольны. Намінантаў павіншуюць Уладзімір Арлоў, Валянцін Акудовіч, Лявон Баршчэўскі, Павел Бераговіч,Генадзь Бураўкін, Уладзімір Някляеў, Барыс Пятровіч. Вядоўца — Андрэй Хадановіч. Выступіць гурт “Рэха”.

Чытаць цалкам

15 сакавіка 2013

“Наш вясёлы апакаліпсіс” прыйдзе 15 сакавіка

Філасофія для нас пачынаецца недзе ў Грэцыі і далей пасяляецца дзесьці ў Германіі і Францыі, але зусім не ў нашых найбліжэйшых суседзяў. Кнігі серыі “Сярэднееўрапейскае мысленне” імкнуцца пераадолець гэты стэрэатып. Кнігі, якія будуць прэзентавацца на сустрэчы: • Лешак Калакоўскі. Наш вясёлы апакаліпсіс (зборнік эсэ); • Іржы Пржыбань. Дысiдэнты права: пра “аксамітныя рэвалюцыі” 1989 года, спосабы легітымацыі, фікцыі легальнасці і сучасную версію грамадскае дамовы (манаграфія); • Юзэф Тышнэр. Мысленне паводле каштоўнасцяў (манаграфія). Сярод выступоўцаў — перакладчыкі і філосафы Аляксей Ластоўскі, Таццяна Урублеўская, Павел Баркоўскі, Валянцін Акудовіч, Лілія Ільюшына. Вядоўца імпрэзы — Ігар Бабкоў. Пачатак а 19-й.

Чытаць цалкам

14 сакавіка 2013

Беларуская літаратура ў кніжным Ляйпцыгу

Стэнд Е504 “Кнігарня логвінаЎ — Books from Belarus” (хол №4). Вул. Messe Allee 1, Ляйпцыг. Акрамя гэтага на прылеглым прэс-стэндзе Е505 OstSüdOst адбудуцца дыскусіі і сустрэчы з беларускімі літаратарамі. Расклад выступаў 14 сакавіка Пра стан сучаснай беларускай прозы раскажа арт-дырэктар кнігарні “логвінаЎ” Павал Касцюкевіч. Пачатак а 14-й. У дыскусіі, прысвечанай фемінізму ва Усходняй Еўропе, возьме ўдзел Таццяна Заміроўская. Пачатак а 16-й. 15 сакавіка У дыскусіі “У пошуках ідэнтычнасці” разам з украінцам Міколам Рабчуком і Аднай Ротэнберг возьме ўдзел Валянцін Акудовіч. У дадатак спадар Валянцін прадставіць нямецкі пераклад сваёй кнігі “Код адсутнасці”. Пачатак а 13-й. У дыскусіі “Тэатральны ландшафт” разам са сваімі ўкраінскімі і польскімі калегамі возьме ўдзел драматург Андрэй Курэйчык. Пачатак а 14-й. У дыскусіі, прысвечанай авангарду, возьме ўдзел Артур Клінаў. Пачатак а 15-й. У сустрэчы “Беларусь у фокусе” возьмуць удзел Віктар Марціновіч і Вальжына Морт, якая прадставіць нямецкія…

Чытаць цалкам

№21: Знак прысутнасці

Змест